“Na presente llexislatura, como nes anteriores, el Grupu Parlamentariu de FORO Asturias na Xunta Xeneral sigue defendiendo el derechu a emplegar la llingua asturiana nel Plenu y les Comisiones parllamentaries”
“Denunciamos la utilización política que determinaos colectivos faen de la llingua asturiana pa dividir y crispar a la sociedá, cuando les llingües tan perriba d’ideoloxíes y estratexes polítiques”
FORO Asturias súmase un añu más a la celebración del XLII Dia de Les Lletres Asturianes
07.05.2021 (Uviéu).- El secretariu xeneral y voceru parllamentariu de FORO Asturias na Xunta Xeneral, Adrián Pumares, asiste güei acompañáu de varios dirixentes foristes al actu institucional qu’organiza l’Academia de la Llingua Asturiana nel Teatru Campoamor con motivu del XLII Día de les Lletres Asturianes.
Pumares recordó que “FORO Asturias, dende la so fundación va 10 años, amosó siempres el so compromisu cola defensa y dignificación del asturianu y la fala eonaviega, emplegando con normalidá y arguyu estes llingües milenaries del Principáu d’Asturies na Xunta Xeneral y nos conceyos. Dientru del partíu vívese con normalidá l’usu de los tres idiomes d’Asturies a nivel d’organización, dende les agrupaciones llocales fasta la dirección autonómica, al igual que sucede na sociedá asturiana. Amás dalgunos de los dirixentes que lleven nel partíu dende la so fundación son hestóricos activistes de la defensa y normalización del asturianu y la fala eonaviega”.
El dirixente forista afirmó que “na presente llexislatura, como nes anteriores, el Grupu Parlamentariu de FORO Asturias na Xunta Xeneral sigue defendiendo el derechu a emplegar la llingua asturiana nel Plenu y les Comisiones parllamentaries; lo que ye normal nel día a día de les asturianes y los asturianos tien que selo tamién nel Parllamentu asturianu”.
Pumares criticó “la utilización política que determinaos colectivos faen de la llingua asturiana pa dividir y crispar a la sociedá asturiana, cuando les llingües tan perriba d’ideoloxíes y estratexes polítiques. Vamos siguir puxando por valtiar complexos y prexuicios respectu al usu del patrimoniu llingüisticu de tolos asturianos”.
Pumares terminó diciendo que “nel dia de les lletres garantizamos la nuestra voluntá firme de siguir apostando por un usu de la llingua asturiana integrador, respetuosu y tolerante”.